მწვანე ალტერნატივა მდ. ბუჯაზე ახალი სახიდე გადასასვლელის მშენებლობასა და ექსპლუატაციის პროექტზე გაცემული გარემოსდაცვითი გადაწყვეტილების გაუქმებას ითხოვს

2018 წლის 26 მარტს საქართველოს გარემოს დაცვისა და სოფლის მეურნეობის მინისტრმა გამოსცა ბრძანება №2-181, რომლითაც საქართველოს საავტომობილო გზების დეპარტამენტს მიენიჭა შიდასახელმწიფოებრივი მნიშვნელობის ჩოლაბურის ხიდი – თერჯოლა –  ტყიბულის საავტომობილო გზის მე-8 კმ -რუფოთი – ალისუბანი – საზანო – თუზი – ქვაციხე – კიცხის საავტომობილო გზის 21-ე კმ-ზე, მდ. ბუჯაზე ახალი სახიდე გადასასვლელის მშენებლობისა და ექსპლუატაციის უფლება.

ბრძანების თანახმად, გადაწყვეტილების მიღება მოხდა  გარემოსდაცვითი შეფასების კოდექსის 48-ე მუხლის პირველი ნაწილის საფუძველზე.

„გარემოსდაცვითი შეფასების კოდექსის“ 48-ე მუხლის პირველი პუნქტის თანახმად, 2018 წლის 1 იანვრამდე (ანუ კოდექსის ამოქმედებამდე) ნებართვის გაცემისთვის დაწყებული ადმინისტრაციული წარმოების პროცედურები უნდა დასრულდეს წარმოების დაწყების მომენტისთვის მოქმედი წესების, ანუ „გარემოზე ზემოქმედების ნებართვის შესახებ“ კანონით დადგენილი წესების შესაბამისად.

მდ. ბუჯაზე ახალი სახიდე გადასასვლელის მშენებლობისა და ექსპლუატაციის პროექტის შესახებ გარემოსდაცვითი გადაწყვეტილების მიღებისათვის ადმინისტრაციული წარმოება დაიწყო 2018 წლის 1 იანვრის შემდეგ; თუმცა, სამინისტრომ გადაწყვეტილების მიღებისათვის იხელმძღვანელა „გარემოზე ზემოქმედების ნებართვის შესახებ“ კანონით დადგენილი, ასეთი შემთხვევებისათვის უკვე ძალადაკარგული  წესით.

2018 წლის 18 ივნისს მწვანე ალტერნატივამ ადმინისტრაციული საჩივრით მიმართა საქართველოს მთავრობას და მოითხოვა საქართველოს გარემოს დაცვისა და სოფლის მეურნეობის მინისტის 2018 წლის 26 მარტის №2-181 ბრძანების ბათილად ცნობა. ვინაიდან თითქმის ორი თვის განმავლობაში საქართველოს მთავრობამ არ განიხილა წარდგენილი ადმინისტრაციული საჩივარი, 2018 წლის 17 აგვისტოს მწვანე ალტერნატივამ თბილისის საქალაქო სასამართლოს სარჩელით მიმართა.

2019 წლის 25 იანვარს გამართულ სხდომაზე მოსამართლე თამარ მეშველიანმა გამოაცხადა სასამართლოს გადაწყვეტილება, რომლის თანახმად მწვანე ალტერნატივას სარჩელი არ დაკმაყოფილდა. გადაწყვეტილების მიღებიდან 14 თვის შემდეგაც მწვანე ალტერნატივას არ გადასცემია გადაწყვეტილების ტექსტი – არც სარეზოლუციო და არც დასაბუთებული.